Desnos, Robert. Poeta frantsesa (Paris, 1900 - Terezin, Txekoslovakia, 1945). Surrealismoari lotu zitzaion hasieran eta Deuil pour deuil (1924) eta La liberté ou l'amour (Askatasuna edo maitasuna, 1927) poema liburuak eman zituen argitara. Bigarren obra honen ondorioz epaitu egin zuten, gizartearen eragozpenak gainditzeko matxinadaren alde agertzen zelako. Bigarren Mundu Gerran Frantziako erresistentziako kide izan zen eta garai hartan idatzi zuen bere eleberri bakarra (Fortunes, 1942). Gestapok atxilotu zuen 1944. urtean eta Txekoslovakiako kontzentrazio esparru batera eraman zuen. Obra nagusiak: Corps et Biens (1930) eta Choix de poèmes (1945).

[Idazleari buruzko informazio gehiago]

Yourcenar, Marguerite. (Jaiotza izenaz, Marguerite de Crayencour). Belgiar idazlea (Brussel, 1903 - Northeast Harbor, Estatu Batuak, 1987). Eleberriak, saiakerak eta kontakizun laburrak idatzi zituen. Etxean egin zituen ikasketak, eta bidaia asko egin zituen gaztetan aitarekin. Hura hil ondoren bidaiatzen jarraitu zuen, harik eta Bigarren Mundu Gerraren hasieran Estatu Batuetan finkatu zen arte. Yourcenarren literatura lanetan aipagarri dira estilo zehatz klasikoa, erudizioa eta zorroztasun psikologikoa; aldi berean giza patuaren, moralaren eta aginpidearen gaineko meditazioak ere ugariak dira. Liburu nagusietan antzinako garaiak eta pertsonaiak landu ditu; hala, haren maisu-lana, Mémoires d'Hadrien (1951, Hadrianoren oroitzapenak, Jose Agustin Arrietak euskaratua), eleberri historikoa da, enperadore hura eta bere garaia agertzen dituena. Eleberri historikoa da orobat L'Oeuvre au noir (1968), XVI. mendeko alkimista baten irudimenezko biografia. Beste lanen artean aipagarri dira Alexis (1929, Maite Gonzalezek euskaratua) eta Nouvelles Orientales (1938) bildumako kontakizunak. Saiakera ugari idatzi zituen, eta itzulpena ere landu zuen. 1980. urtean Académie Françaiseko kide egin zuten; erakunde horretako lehen emakumea izan zen.

[Idazleari buruzko informazio gehiago]

Sand, George. (Jaiotza izenaz, Amandine-Aurore-Lucile Dupin). Frantses idazlea (Paris, 1804 - Nohant, 1876). Casimir Dudevant baroiarekin ezkondu zen (1822) eta bi seme izan ondoren, senarrarengandik bereizi zen (1830). Hainbat maitale izan zituen: Jules Sandeau eleberrigilea, Alfred Musset poeta, Michel Bourges eta Chopin musikaria, besteak beste. Gaztetan eskandalu handiak eragin eta zeresan handiak eman zituen, gizonezkoek bezala jazten zelako eta indarrean zegoen moralaren kontra agerian jokatzen zuelako. 1835ean, Michel Bourges bere maitaleak hartara eraginda, politikan hasi zen; Liszt-ekin eta Lamennais-ekin harremanak izan zituen; geroago Pierre Leroux sozialistaren jarraitzaile sutsu bilakatu zen. Hala, ideologiak pisu handia zuten eleberriak idatzi zituen garai hartan. 1841. urtean La revue indépendante aldizkaria sortu zuen Pierre Leroux-ekin. 1848ko iraultzan Parisera joan zen eta Errepublikako buletinean idatzi zuen. Iraultza zapaldu zutenean, Nohant-era bildu zen eta han bizi izan zen hil arte. Napoleon III.aren agintaldian bere ideien alde borrokatu zen eta idazle gazteak babestu zituen (G. Flaubert, besteak beste). Nohart-en eleberri asko idatzi zituen; hasieran eleberri sozialak eta, gero, zahartu zenean, oroimen liburuak eta maitasun eleberriak. 1871. urtean, Parisko komunaren aurka egin zuen eta matxinada hartan parte hartu zutenak kondenatu zituen. Liburu asko idatzi zituen; aipagarri dira, besteren artean: Rose et Blanche (1831); Indiana eta Valentine (1832); Lelia (1833); Jacques (1834); Mauprat (1837); Un hiver à Majorque (1842, Negu bat Mallorcan, amodiozko eleberria, Chopinekin izan zituen harremanei buruzkoa); Horace (1842); La mare au diable (1846, Deabruaren osina), Elle et lui (1859, amodiozko eleberria, Musset olerkariarekin izandako harremanei buruzkoa). Hil ondoren haren eskutitzak eta egunkaria argitaratu ziren. Eleberriez gainera, antzerkia ere idatzi zuen.

[Idazleari buruzko informazio gehiago]

[Idazleari buruzko informazioa]

[Idazleari buruzko informazioa]

[Idazleari buruzko informazioa]