Ba al dakizu zenbat euskaldun garen Basaurin? Kalean, tabernetan, dendetan entzuten denari erreparatuz gero, banaka batzuk  garela uste izango duzu zeuk ere, baina oker gaude: asko eta asko gara baina gehienetan isolatuta sentitzen gara, ezin dugulako geure herrian euskaraz bizi.

Kezka honek bultzatuta, 1995. urtean Basaurin antolatu ziren soziolinguistika jardunaldi batzuen ondoren, bertara hurbildu ginen hainbat euskaltzalek Euskal Herriko zenbait herritan euskararen normalkuntzarako burutzen ari ziren ahalegin eta lanen berri izan genuen, eta, ondorioz, gure herrian euskararen egoerari buruzko gogoeta sakona egitea merezi zuela ikusi genuen.

Hasierako datu-azterketa eginda eta euskaraz bizitzeko ahaleginaren akuiluarekin, elkartearen izena aukeratu eta logoa lehiaketa bidez autatu ondoren, Basaurin Euskarabila Elkartea sortzea erabaki genuen urtebeteko harreman, elkarrizketa eta lanen ondoren.

1996ko otsailaren 3an egin zen sortzeko Batzar Nagusia eta astebete beranduago jendaurreko aurkezpen ekitaldia, Ibaiganeko Kultur Etxean, Basaurin zeuden bertoko euskaldun zahar nagusienei omenaldia eginez, hizkuntzaren katea apur ez dadin egin duten ahaleginagatik geure esker ona adierazteko.

Ekitaldi hartara, beste zenbait elkarte eta erakunde ere gonbidatu genituen (Euskaltzaindia, Eusko Jaurlaritza, Basauriko Udala, AED Elkartea…), Euskarabila Elkartearen sorreraren lekuko eta sustatzaile izan zitezen.

2006an, beraz, gure X. urteurrena ospatu genuen eta oraindik ere, hasierako asmo eta helburuei tinko eusten diegu, hau da, Basaurin eguneroko bizitzan, euskararen normalkuntzan eta erabilera bultzatzeko euskaldun guztien bilgune izango den elkartea izatea.

Urte hauetan hainbat jarduera egin eta sendotu ditugu bai kulturaren munduan, bai haur eta gazteen alorrean ere: ipuin erotikoen lehiaketa, sukaldaritza ikastaroak, idazleekiko solasaldiak, aisialdi-begirale ikastaroak, asteburuetako irtenaldiak… Hauek eta Basauri mailan antolatu diren beste zenbait ekimenetan ere (Kontseilua, Bai Euskarari, Egunkaria, Korrika…) hartu dugu parte, eta une honetan herrian euskararen aldeko lanean erreferentzia izatea lortu dugula esan daiteke.

141 bazkide gara une honetan, baina askoz gehiago izan gintezkeela uste dugu: Euskarabila Elkarteak Basauriko euskaldunok batu eta elkar ezagutarazi behar gaitu, adin, lanbide, ideologia, kolore zein gizarte-esparru guztietako euskaldunak, alegia.

Horixe da gure erronka eta gure ametsa, lagunduko al diguzu ahalegin honetan? Zure zain gaude!!!

HURBIL ZAITEZ EUSKARABILARA!!!

Egin klik argazkietan jatorrizko tamainan ikusteko:

Dokumentu eta lotura interesgarriak

antzerkia bakarrizketa bertsolaritza Biok diaporama EHZ erakusketa errezitaldia familian film_laburrak gabonak gutuna hitzaldiak idazleak ikastaroa ikuskizunak inauteriak ipuin erotikoak irteerak jolasak komunikabideak korrika larrugintza lehiaketa liburuak maskarada pintura sendabelarrak sukaldaritza surf transgenikoak travel_club xaboi zuberoa

Zer deitzozu webgune berriari buruz?

 Loading ...