josi.klaki.net

13. september 2006

Helvítis dópistar og þjófar

Í morgun vaknaði ég við símtal frá lögreglunni. Þeir höfðu farið inn til einhvers sprautufíkils á Hverfisgötunni og séð þar glænýjan skenk frá Ikea og farið að spá í hvernig hann hafði fengið hann, og eftir smáleit fannst kvittun, í mínu nafni. Þarna var sumsé þjófurinn sem rændi jakkanum mínum og veskinu um daginn.
Í ljós kemur að þrátt fyrir að ég tékkaði á stöðunni á kortunum um leið og ég fattaði að einhver hafði farið inn og stolið jakkanum, þá komu færslurnar ekki strax fram. Mannandskotinn hafði tekið út af kreditkortinu mínu fyrir 58.150 kr.
Ekki hefur löggan enn fundið jakkann, en ég vona að Visa endurgreiði mér peningana. Það er í vinnslu hjá Visa eins og er.
Ég hef síðan fengið að heyra að þetta sé mjög vafasamur karakter sem rændi mig, búinn að vera vitni að tveimur dóptengdum dauðsföllum og allt. Spurning hvernig það mun ganga að rukka hann um jakkann minn, það gæti verið að ég myndi þurfa að höfða einkamál gagnvart honum til þess að fá andvirðið...

En það má samt skemmta sér yfir þessu, við skulum skoða til gamans hvað hann hefur gert með kortinu mínu:

Fyrst er það Strætó BS, 6.200 kr. Ætli hann hafi verið að kaupa sér grænt kort? Eða tvö?

Svo er það Bónusvídeó, 6.540 kr. Alltaf gott að borga leiguskuldirnar, og jafnvel kaupa sér kók og popp.

Næst kom Olís, Mjódd. Heilar 7.115 kr. Skyldi hann hafa verið að kaupa bensín? Eða var hann bara að nota græna kortið? E.t.v. var hann að kaupa lím til að sniffa?

Svo liggur leiðin aftur niður í bæ, í 10-11 Barónsstíg. Þar verslar hann nauðsynjar til heimilisins fyrir 5.804 kr. Örugglega speltbrauð og heilsufæði.

Þá kemur að gleðinni, 12.541 kr. í Vínbúðinni Holtagörðum. Kannski fór þetta allt í Créme de Menthe flöskur?

Og svo fer hann hinum megin við vegginn til Ikea og kaupir skenkinn fína á 19.950 kr. Örugglega verið skenkur sem heitir eitthvað eins og Uddevalla.

Starfsfólk þessara verslana ætti að taka betur eftir.

Lífið og tilveran | Jóhannes Tryggvason skrifaði kl. 17:41 | Varanleg slóð | 2 ummæli

12. september 2006

Kominn heim, jakka stolið

Fyrir viku fór ég til Barcelona. Þessvegna hefur enginn getað náð í mig, og þessvegna fór ég. Það var mjög fínt að sitja og éta Tapas, verandi utan þjónustusvæðis. Grey vinnurnar mínar sem náðu ekki í mig...

En annars lenti ég í því fyrir tveimur vikum síðan að ég var að vinna nálægt Hlemmi (hjá Filmus á Grettisgötunni) og um kvöldmatarleytið hefur einhver helvítis róninn komið inn og stolið fína leðurjakkanum mínum með vespumerkjunum, með veskinu með ökuskírteininu og debet/kreditkorti. Ef þið sjáið einhvern í svörtum leðurjakka með gulu vespumerki á hægri ermi, vængjuðu vespumerki á bakinu og bláu og hvítu vespumerki á vinstri ermi, þá vinsamlega lemjið viðkomandi og hringið í lögregluna og látið handtaka. Grrr...

Lífið og tilveran | Jóhannes Tryggvason skrifaði kl. 14:55 | Varanleg slóð | 0 ummæli

19. júní 2006

Þrítugur

Greinarhöfundur um tvítugt.

Í gær varð ég þrítugur. Ég hélt upp á þetta um helgina, að kvöldi 17. júní hélt ég upp á afmælið með vinapakkinu mínu á Rósenberg. Krakkarnir slógu saman í iPod ostakörfu handa mér. Ég á skemmtilega vini! Nú get ég farið á klóið og haldið áfram að hlusta á tónlist í leiðinni, alveg eins og eftir að ég fékk vasadiskó í jólagjöf 1985 og gat farið um allt og hlustað á Bon Jovi kassettuna mína -a.m.k. þar til batteríin fóru að klárast og allt varð mjööööög hæææææægt. Ef ég svara ekki fólki næstu vikur, athugið þá fyrst hvort ég sé með hvít heyrnartól í eyrunum ;-)
Ingvar Valgeirs hringdi og óskaði mér til hamingju og sagðist hafa reddað spes gjöf. Hann bað mig um að líta út um gluggann, hann hefði reddað sviði og nokkrum poppurum til að taka lagið mér til heiðurs. Flott gjöf.
Hraun! léku snilldarlega fyrir fólk þarna og ég fékk að taka lagið með þeim, tók Rhinestone Cowboy eftir Glenn Campbell við góðan orðstír og Forever Young eftir Alphaville við, ja, ekki alveg jafn góðan orðstír. Þegar Forever Young var hálfnað brutust út heljarslagsmál fyrir utan gluggann, og einhver var kýldur niður og sparkað í liggjandi. Ætli ég reyni ekki að vanda mig betur við sönginn næst...

Í gær var svo fjölskylduboðið heima hjá pabba og mömmu. Þar gaf fjölskyldan mér örlítið af útivistardóti sem á eftir að virka vel í væntanlegri Hornstrandaferð sem Bragi er að skipuleggja. Systir mín og mágur gáfu mér líka Draumalandið eftir Andra Snæ Magnason. Ég las hana alla í gærkvöldi. Og þar er eftirfarandi klausa frá 1918:

Danmörk tilkynnir erlendum ríkjum að hún hafi samkvæmt efni þessara sambandslaga viðurkennt Ísland fullvalda ríki, og tilkynnir jafnframt, að Ísland lýsi yfir ævarandi hlutleysi sínu og að það hafi engan gunnfána.

Þegar ég las þetta varð mér hugsað til embættisverka síðasta og þarsíðasta forsætisráðherra og ég táraðist. Ég hlýt að vera að meyrna í ellinni.

Lífið og tilveran | Jóhannes Tryggvason skrifaði kl. 23:25 | Varanleg slóð | 3 ummæli

14. júní 2006

Ég er að verða þrítugur

18. júní verð ég þrítugur.

Fokk. Sjitt. Andskotinn. Ég er að verða gamall.

Ég gafst upp á að finna eitthvað frumlegt að gera á afmælinu svo að ég ætla bara að vera á Rósenberg að kvöldi 17. júní þar sem Hraun! verða að spila. Allir sem vilja samhryggjast með mér eru velkomnir.

Ætli ég verði ekki á staðnum frá ca. kl. 21:00, svo hefst ball með strákunum seinna um kvöldið.

Lífið og tilveran | Jóhannes Tryggvason skrifaði kl. 12:59 | Varanleg slóð | 3 ummæli

11. júní 2006

Dramatískt SMS

Rétt í þessu var ég að fá eftirfarandi skilaboð:

Ertu ekki ad fatta hintinn, hann vill ekkert med thig hafa! Thu synir honum enga virdingu, veistu hvad virding er i sambandi? Nei greinilega ekki ! Gaui a skilid almennilega stelpu sem synir honum virdingu og er ekki ad hanga med fyrrverandi medan hun er med honum! Thu att ekki skilid gaua fyrir 5kall, skriddu bara aftur til ola, lytur ut fyrir ad hann se sa eini sem vill hafa eitthvad med thig ad gera .. Og ef thetta var of flokid fyrir thig, tha skal eg audvelda ther thetta: T H E T T A E R B U I D!

Mér dettur helst í hug að þetta tengist þessum smákrökkum sem hringja í mig í hverri viku og biðja um Kamillu.

Ýmis vitleysa | Jóhannes Tryggvason skrifaði kl. 13:28 | Varanleg slóð | 6 ummæli

josi.klaki.net

Vefsíða Jóhannesar Tryggvasonar

Leit

Flokkar

Nýlegar greinar

Nýleg ummæli

Tenglar